Castellano Galego

ANO MARUJA MALLO. "DÍA DAS ARTES GALEGAS 2017"

Ampliar imaxe
Ampliar imaxe

Ampliar imaxeAmpliar imaxe
Ampliar imaxeAmpliar imaxe
A Real Academia Galega de Belas Artes celebrou o sábado 1 de abril, no Teatro Pastor Díaz de Viveiro (Lugo) o acto académico público con motivo do “Día das Artes Galegas 2017”, ao obxecto de render homenaxe á figura da pintora viveirense Maruja Mallo.
 
A apertura do acto correu a cargo do titular da Real Academia Galega de Belas Artes don Manuel Quintana Martelo quen rememorou os dous anos de percorrido do Día das Artes Galegas e ás tres figuras homenaxeadas ata o momento. Fixo fincapé no labor desenvolvido, de maneira altruista, por a Xunta de Goberno estendida ao conxunto do Pleno e aludiu ás actividades que está realizando a Academia. Incidiu no precario estado económico da Institución e na necesidade de recursos para o seu funcionamento, mencionando á catro institucións que aportan fondos (Diputación provincial da Coruña, Concello da Coruña, Fundación Barrié e Xunta de Galicia). Así mesmo, fixo un percorrido polos proxectos expositivos que se están desenvolvendo ou plantexando en relación ás tres figuras xa homenaxeadas no Día das Artes Galegas, co propósito de facer cultura desde Galicia e por Galicia e darlles a proxección nacional e internacional a tan importantes artistas que destacaron nas artes galegas.
Seguidamente a Académica de Número da Sección de Expertos nas Artes dona María Asunción Rodríguez Rodríguez, foi a encargada de realizar a glosa sobre Maruja Mallo, baixo o título “Exótica” un emotivo discurso onde rememora o nacemento da "Institución Libre de Enseñanza" como semente da intelectualidade española de finais do XIX e principios do XX. Tras un percorrido por o ambiente e contexto histórico e cultural do Madrid dos anos centrais da década dos 10 do século XX fixo referencia á "Residencia Internacional de Señoritas de Madrid", ao nacemento da “nova muller” que loitaba por deixar atrás a invisibilidade á que o xénero fiminino estivera sometido, e ás “sin sombreiro”. Neste contexto aparecen as intelectuais e artistas relegadas a un segundo plan históricamente e á figura de Maruja Mallo. Despois de describir o ambiente da Residencia de Estudiantes de Madrid e a conexión de Mallo con Buñuel, Dalí e García Lorca, falou sobre as vivenzas de Maruja Mallo en España, Europa e América e por as características da súa obra e o seu modo de facer poñendo diversos exemplos como A Muller Cabra (1917), A Muller en bicicleta (1930) ou Arxentina (1942), entre outras.
Tamén interviron, a Alcaldesa de Viveiro, dona María Loureiro García, o Presidente da Deputación Provincial de Lugo, don Darío Campos Conde e Conselleiro de Cultura, Educación e Ordenación Universitaria, don Román Rodríguez González que pechou o acto. 

Como despedida, o grupo musical SondeNós, interpretou algunhas pezas do seu repertorio.
                                                                                                            * * * 

En Sesión Ordinaria celebrada o 2 de xullo, o plenario decidiu elixir a candidatura de Maruja Mallo para a celebración do “Día das Artes Galegas” do ano 2017. Nesta deliberación a Academia tivo en conta a importante significación do seu legado e da súa obra plástica, o seu contacto con artistas, escritores e intelectuais como Dalí, Lorca, Bretón ou Eluard, e a súa integración ás vangardas, así como o seu carácter transgresor e defensa dos dereitos da muller.
Por tanto a data do 1 de abril deste ano entrante, conmemoración do “DíA DAS ARTES GALEGAS” estará dedicado a ela e a Academia convida a todos os colectivos do ensino, culturais, etc… a que espallen aspectos desta creadora de vangarda. A Institución irá anunciando unha serie de actividades en relación coa vida e a obra da creadora vivarense. 


Para ver o currículum de Maruja Mallo premer acó

Polo seu aporte divulgativo recoméndase a visualización do documental "Maruja Mallo, metade anxo, metade marisco".
Director: Antón Reixa. Ano: 2010. Duración: 1h. 17 min. Documental producido por la SECC coa colaboración da Fundación Caixa Galicia e TVE. 
Ver documental 

Ver Caderno de Estudios Xerais Nº 9 (21 de abril de 2017) dedicado a Maruja Mallo

ACTIVIDADES EN TORNO A MARUJA MALLO

MARTES 17 DE XANEIRO DE 2017
Conferencia: “DE MARUJA MALLO A ÁNGELA DE LA CRUZ. MULLERES DO SILENCIO” 
Conferenciante: Rosario Sarmiento Escalona
 
Esta charla é un recorrido pola mostra do mesmo titulo que actualmente se exhibe no museo MARCO de Vigo na que se revisa o papel que cumpriron algunhas artistas na historia da creación plástica  da Galicia contemporánea. Tomando como referente o acceso a unha formación académica que lles permite afianzar o seu carácter profesional,  percorreremos diferentes xeracións de artistas ata chegar a aquelas creadoras que acceden por primeira vez en Galicia aos seus estudos superiores, tras a creación da Escola de Belas Artes de Pontevedra en 1990.
     

MARTES 31 DE XANEIRO DE 2017
Documental: “MARUJA MALLO, METADE ANXO METADE MARISCO” 
Autor: Antón Reixa
 
Neste documental Antón Reixa explicará o proceso de elaboración do filme documental e como a personalidade de Maruja Mallo e a súa feminidade radical estaban mesmo por encima do seu grande valor artístico. Se cadra, non suficientemente valorado.
 
 
MARTES 7 DE FEBREIRO DE 2017
Conferencia: “MARUJA MALLO E A NOVA IDENTIDADE FEMININA” 
Conferenciante: Carlos Bernárdez
 
A vida e a obra de Maruja Mallo suxire o concepto de “nova muller”, que se desenvolve na sociedade e, nomeadamente, na cultura europea de entreguerras. Mulleres novas, con saias curtas e cabelos cortados ao garçonne e cigarro na man. Imaxe e mito dos dourados anos vinte. Debemos entender que estes aspectos, certamente, responden a unha realidade social deste tempo mais que a eles hai que sumar mudanzas e vontades de maior calado, entre as que cómpre sinalar que moitas mulleres, en particular as que proceden dos círculos intelectuais, artísticos e literarios, acrecentan a esta imaxe unha nova consciencia social, determinada sobre todo pola autonomía, pola transposición de barreiras e pola igualdade de dereitos.
As artes serán un dos ámbitos de actuación que fornezan á “nova muller” a posibilidade concreta de realización, aínda que con grandes dificultades e incomprensións. A obra pictórica da artista galega vai exemplificar como poucas estas ideas, xa que nela a muller, individual e colectivamente, vai ser o centro da creación, dotada de autoconfianza plástica, sen ningunha tentación de egocentrismo, senón movida por unha necesidade de seguir o instinto lúdico e formal na relación do eu coa imaxe plasmada na súa variada e rica produción. A actitude que asume a muller na obra de Maruja Mallo hai que ligala, xa que logo, á arela de emancipación da muller burguesa e á incorporación da muller ao mundo do traballo nas fábricas, que desde os anos da 1ª Guerra Mundial é moi relevante, quer en Europa, quer en América do Norte
 
 
MARTES 21 DE FEBREIRO DE 2017
Conferencia: “MARUJA MALLO Á LUZ DA MEMORIA. APROXIMACIÓN Á BIOGRAFÍA DUNHA MULLER LIBRE” 
Conferenciante: Carme Vidal
 
Cando Maruja Mallo regresa a Madrid despois dun longo exilio ten que inventarse de novo. O silencio impuxérase e xa ninguén lembraba aquela artista que participara da cultura emerxente e entusiasta dos anos trinta e transgredira as normas do seu tempo. Na intervención, farase unha aproximación á biografía de Maruja Mallo coa luz da memoria, atopándonos cunha muller cunha poderosa capacidade de crear, irreverente, valente, atrevida e moderna- E comprometida cos ideais de liberdade que a levaron ao exilio e que se reflicten na súa propia obra.
 
 
MARTES 21 DE FEBREIRO DE 2017
Conferencia: “MARUJA MALLO: ARTISTA COMPROMETIDA” 
Conferenciante: Carlos Nuevo Cal
 
A charla consistirá nunha rápida análise da evolución da vida e obra de Maruja Mallo, unha artista total cunha personalidade moi ampla e poliédrica, capaz de utilizar maxistralmente distintos rexistros complementarios: pintora, ceramista, escenógrafa, muralista, deseñadora, teórica da arte e innovadora de universal curiosidade. Igualmente, trataremos de explicar o seu particular proceso de concienciación e de compromiso político-social, así como as distintas influencias e relacións con diferentes persoeiros dos eidos artísticos e culturais, tanto español, como europeo ou americano


SÁBADO 1 DE ABRIL DE 2017
Conferencia: "MARUJA MALLO, personaxe da “arte nova” (1927-1936)".
Conferenciante: María Victoria Carballo-Calero Ramos

Esta conferencia foi pronunciada no Museo do Mar de Cervo (Lugo) como clausura do IV Congreso de Xéneros, Museos, Arte e Educación. 
        

Fecha: 03/04/2017







Contacto  |  Aviso legal  |  

MARTES 23 DE MAIO. CONFERENCIA: “DO CONTINXENTE AO NECESARIO. ARQUITECTURAS RECENTES” 23/04/2017
 
XOVES DÍA 1 DE XUÑO CONCERTO A BENEFICIO DE “ASOCIACIÓN BENÉFICA RENACER” DE A CORUÑA 22/04/2017
 
ANO MARUJA MALLO. "DÍA DAS ARTES GALEGAS 2017" 03/04/2017
 
O ARQUITECTO DON MANUEL GALLEGO JORRETO NOMEADO ACADÉMICO DE HONRA 01/04/2017
 
INGRESO DE D. ÁLVARO SIZA VIEIRA COMO ACADÉMICO DE HONRA 30/03/2017
 
O MESTRE MATEO NO MUSEO DEL PRADO: UNHA INICIATIVA DA REAL ACADEMIA GALEGA DE BELAS ARTES 29/11/2016
 
ENTREGA DOS PREMIOS "MARCIAL DEL ADALID" 15/10/2016
 

Desarrollo web: Brigantia