A Real Academia Galega de Belas Artes (RAGBA), en colaboración coa Deputación da Coruña, organiza dende 2018 os Encontros de Mariñán. Residencia de Artistas Emerxentes, que teñen como obxectivo crear sinerxías e propiciar a interdisciplinariedade entre os distintos centros de formación artística superior de Galicia. Teñen lugar no Pazo de Mariñán, Bergondo.

Cada edición, toma como referencia ao artista que a RAGBA lle adica O día das artes. Partindo dun tema os distintos centros seleccionan aos participantes a través da presentación de proxectos. Os participantes coñecen os proxectos e traballan na relación entre disciplinas. O Encontro de Mariñán, que dura 5 días, fai posible a materialización in situ dos proxectos e o desenvolvemento das sinerxías xurdidas. A creación e a convivencia xeran resultados híbridos que enriquecen o pensamento crítico e artístico de cada participante.

Centros que participan nos encontros:

• -Conservatorios Superiores de Música de Coruña e Vigo.
• -Escolas de Arte e Superiores de Deseño Antonio Faílde, Mestre Mateo, Pablo Picasso e Ramón Falcón.
• -Escola Superior de Arte Dramática de Vigo.
• -Facultade de Belas Artes de Pontevedra.
• -Facultade de Deseño de Pontevedra.
• -Facultade de Arquitectura da Coruña.
• -Escola de Imaxe e Son da Coruña.