O vindeiro sábado día 1 de abril terá lugar ás 12 horas no Auditorio do Teatro Afundación de Vigo o  acto principal do Día dás Artes Galegas 2023.. Ao longo de todo este ano, dedicado a Martín Códax, terán lugar diferentes iniciativas entre as que cabe destacar exposicións, concertos ou publicacións en torno ao xograr, do que se conservan 7 composicións, 6 con anotacións musicais (Pergamiño Vindel, Biblioteca Morgan N.E). Obras que proban as relacións atlánticas dun confín aberto a portos e a encrucilladas.
 
Martín Codax (s. XIII-XIV)) foi a figura elixida, tras votación regulamentaria, en Sesión Ordinaria celebrada o 18 de xuño de 2022 para ser homenaxeada ao longo do 2023 tras proposta subscrita por académicos e varios colectivos culturais de Galicia, motivo para a profundar e difundir a súa figura. Con tal motivo a Academia abre  e convida a un ano de actos de sensibilización arredor das orixes, da orixinalidade e a achega de Galicia á música e á historia da arte.
 
A iniciativa desta celebración na xornada de cada 1 de abril, naceu da RAGBA no ano 2015, celebrando ao Mestre Mateo, quen nesa data do 1188  dirixiu a colocación dos dinteles do Pórtico da Gloria na Catedral compostelá, segundo consta nos mesmos. Na pasada edición do ano 2022 a figura homenaxeada foi o pintor lalinense José Otero Abeledo “Laxeiro”.