O vindeiro sábado 9 de maio terá lugar no Pazo de Trasalba de Ourense a Sesión extraordinaria pública de entrega dos Premios á constancia musical «Marcial del Adalid» aos compoñentes da Coral “De Ruada” don Carlos Álvarez Expósito; don Gerardo Gómez García; dona María Gómez Cid; dona María Elena González Iglesias; don Alfonso Rapela Sotelo; don Manuel Rodríguez Rodríguez; don José Manuel Vázquez Rodríguez e don Camilo Villanueva Valdés.

O acto contará coa intervención dos académicos don Maximino Zumalave Caneda, quen lerá a laudatio na honra da Coral e dos coralistas, don Felipe-Senén López Gómez, secretario da Institución e dona María Victoria Carballo-Calero Ramos, quen exercerá de presidenta accidental, así como da presidenta da Agrupación dona Fátima María Malingre Grande e rematará coa interpretación por parte da Coral das obras “Foliada de Mahía”; “Pandeirada de Trasalva”; “Alalá de Vilanova” e “Airiños, Ariños, Aires”

En xuño de 1949, a Academia instituíu os premios, coa denominación de «Marcial del Adalid», «Para estímulo de todo aficionado a la Música, y con objeto de enaltecer la destacada labor de aquellos elementos que, desinteresadamente, vienen contribuyendo eficazmente a las meritorias actividades de las diversas Agrupaciones musicales de Galicia».

Na sesión ordinaria celebrada o día 30 de abril de 2005, a Corporación aprobou as novas Bases para a concesión dos premios «como estímulo á práctica musical non profesional, que de forma desinteresada e constante veñen realizando persoas e institucións de Galicia, mediante a súa participación e mantemento de agrupacións artísticas», nas súas dúas modalidades: a) Premio persoal á constancia musical, consistente en Diploma e Insignia. b) Distinción para personalidades destacadas no eido da música non profesional e para agrupacións musicais, consistente en Diploma e Medallas de Ouro e Prata.