O vindeiro martes 28 de outubro continúa o Ciclo de conferencias “Experiencias en arquitectura. Investigacións e realizacións recentes” encadrado nos “Martes das Artes”. A actividade está coordinada polo arquitecto e académico Xosé Manuel Casabella López.
    
A sexta conferencia titulada “Recreacións virtuais de arquitecturas perdidas e soñadas. Novas metodoloxías para investigación da arquitectura e o patrimonio en Galicia” será impartida por Jesús Ángel Sánchez García quen tratará sobre a intersección entre o coñecemento histórico e as tecnoloxías dixitais, a creación de modelos 3D de arquitecturas desaparecidas e proxectadas pero non construídas en Galicia que está a servir, mediante varios proxectos financiados con fondos estatais e europeos, para concretar novas metodoloxías de investigación desenvolvidas desde o grupo IDEAHS, no Departamento de Historia da arte da Universidade de Santiago de Compostela, en colaboración con deseñadores gráficos do CIAG. As problemáticas para afrontar e as novas posibilidades para análises de información gráfica e difusión de resultados son aspectos integrados nunhas investigacións académicas orientadas ademais a crear novos rexistros de patrimonio dixital..
 
Todos os actos do ciclo terán lugar ás 20:00 horas no Salón de Actos da Real Academia Galega de Belas Artes (Praza Pintor Álvarez de Sotomayor, 1. A Coruña) con entrada libre ata completar capacidade.
 
O acto está patrocinado pola Xunta de Galicia, Concello da Coruña, Deputación da Coruña e Vicepresidencia da Deputación de Lugo
 
JESÚS ÁNGEL SÁNCHEZ GARCÍA
 
Nado en A Coruña, é doutor en Historia da Arte pola Universidade de Santiago de Compostela e catedrático no mesmo departamento. As súas investigacións teñen como temas a historia da arquitectura e do urbanismo en Galicia, con especial interese por diferentes tipoloxías da modernidade -teatros, cinemas, faros- así como as producións de sobranceiros arquitectos.
 
Premio Galicia de investigación no ano 2000 e coordinador do grupo de investigación IDEAHS da USC, dirixiu varios proxectos financiados nos que a investigación da arquitectura e do patrimonio de Galicia aproveita as novas ferramentas para creación de modelos virtuais en 3D. Un deses proxectos, Portomarín Virtual, realizado en colaboración con Julio Vázquez Castro e os deseñadores gráficos do CIAG, foi recoñecido no ano 2024 co premio da sociedade Humanidades Digitales Hispánicas á mellor ferramenta ou recurso dixital.